ab aksar chup-chup se rahe hain yun hi kabhi lab khole hain 
pahale "Firaq" ko dekhaa hotaa ab to bahut kam bole hain 

din mein ham ko dekhane vaalo apane apane hain auqaat 
jaao na tum in Khusk aankhon par ham raaton ko ro le hain 

fitarat merii ishq-o-muhabbat qismat merii tanhaai 
kahane ki naubat hi na aayi ham bhii kasuu ke ho le hain 

baaG mein vo Khvaab-aavar aalam mauj-e-sabaa ke isharon par 
Daalii Daalii nauras patte sahas sahaj jab Dole hain 

uf vo labon par mauj-e-tabassum jaise karvaten lein kaun dein 
haay vo aalam jumbish-e-mizagaaN jab fitne par tole hain 

in raaton ko hariim-e-naaz kaa ik aalam hoye hai nadiim 
khalvat mein vo narm ungaliyan band-e-qabaa jab khole hain 
 

Gam kaa fasaanaa sunane vaalo aaKhir-e-shab aaraam karo 
kal ye kahaanii phir chhedenge ham bhi zaraa ab so le hain 


ham log ab to paraaye se hain kuchh to bataao haal-e-"Firaq" 
ab to tumhin ko pyaar kare hain ab to tumhi se bole hain